Sunday, June 19, 2011

ကမ်းဝေးလှေ…

မျက်လုံးတွေ လေးလံကျိန်းစပ်နေသော်လည်း တစ်ရေးမှအိပ်မပျော်...။ ဒီနေ့မှ စိတ်ထဲမှာ ပိုကြာနေသလိုပဲ..။ လက်ကနာရီကို ငုံ့ကြည့်မိတော့ ပုံမှန်ပါပဲ။ သွားနေကျခရီးမို့ မွန်းလွဲ သုံးနာရီကျော်ကျော်လောက်ပဲရှိသေး ဒီမိုင်တိုင်ကို ရောက်နေတာ ခါတိုင်းထက်တောင်စောနေသေးသည်..။ 

တစ်ရိပ်ရိပ်ကျန်ခဲ့တဲ့ သစ်ပင်တန်းကြီးတွေ၊ အိမ်တန်းငယ်လေးတွေနဲ့ ကောင်းကင်တိမ်စုထဲကို အုပ်စုလိုက် ဖြတ်ပြီးပျံသန်းနေတဲ့ ငှက်တွေ၊ ပြီးတော့ လေပြေဝေ့ရာဘက်ကို လိုက်လံယိမ်းနွဲ့နေကြတဲ့ စပါးခင်းတွေ..ထိုအရာအားလုံး မြင်နေကျမြင်ကွင်းတွေပါပဲ..။ ဒီနေ့မှ ဒီမြင်ကွင်းတွေက အနှေးရုပ်ရှင်ပြကွက်လိုဘာကြောင့် ဖြစ်နေရသလဲ..။ အိပ်ရေးမဝလို့ မဟုတ်တာသေချာသည်..။ ကားပေါ်မှာ ငိုက်မြည်းပြီး ပါလာသူတွေတောင် ခေါင်းတစ်ထောင်ထောင်နဲ့ ကားအပြင်ဘက်ကို လှမ်းကြည့်နေကြပြီ..။ ဒါဆိုရင်ရောက်တော့မှာ..။ 
 
-------------------*********---------------------- 

ကားပေါ်ကဆင်းဆင်းချင်း မြေသင်းနံ့ကဆီးကြိုနေသည်..။ နှစ်ပေါင်းအစိတ်ကျော်ကျော် ရင်းနှီးခဲ့သော မြေရနံ့..။ ဒီမြေ ဒီရေ ရနံ့နဲ့ ကင်းကွာခဲ့တာ သုံးနှစ်နီးပါးတောင်ပြည့်လုပြီ..။ အရင်တစ်ခေါက်ပြန်လာတုန်းကတော့ ဒီလောက်စိတ်ထဲမှာ မလွမ်းစဖူး..။ မျက်စိတဆုံးက မြေနီလမ်းကလေးတောင် အရင်ကထက် ခြောက်သွေ့နေပြီ။ သရက်ပင်တန်းတွေလည်း ကြည့်ရတာပိုပြီး အိုမင်းနေသလိုပါပဲ..။ အရင်တုန်းကပုံရိပ်တွေ တစ်ဖြည်းဖြည်းပီပြင်လာတော့ ဖျတ်ကနဲ ပြုံးလိုက်မိသည်..။ သရင်ပင်တန်းအဆုံးက ခရေပင်တန်းနားအရောက်မှာ တစ်စုံတစ်ရာကို ရုတ်တရက်တွေ့လိုက်မိသလို ခြေလှမ်းတွေတုန့်ကနဲရပ်မိလျက်သား..။ 


ဒီနေရာလေးမှာ အသက်လေးဆယ်ကျော် လူကြီးနှစ်ယောက် နှင့် ကလေးလေးနှစ်ယောက် ခရေပန်းခဏခဏလာကောက်တတ်သည်။ လူကြီးနှစ်ယောက်မှာတော့ တစ်ယောက်က ခရေပန်းတွေကို နှီးကြိုးနှင့်သီပြီး ကျန်တစ်ယောက်ကို ပန်ပေးခဲ့ဖူးသည်..။ ယုယုယယညင်ညင်သာသာကလေး..။ ကလေးမလေးက သူလည်းပန်ချင်လို့ အသံစာစာကလေးနဲ့ပြောတော့ ကောင်ကလေးက သူကောက်ထားတဲ့ ခရေပန်းတွေလက်ထဲ လာထည့်သည်.။ ပြီးတော့ ဘာရယ်မဟုတ် သူတို့အားလုံး ပျော်ရွှင်စွာ ရယ်လိုက်ကြဖူးသည်..။ 

လေပူတစ်ချက်ကို ခပ်ပြင်းပြင်းမှုတ်ထုတ်လိုက်သည်.။ ရှေ့နည်းနည်းဆက်သွားရဦးမှာပဲ..။ လှမ်းတော့မြင်နေရပါပြီ။ မမြင်ရသော နူးညံ့ညင်သာတဲ့ကြိုးတွေ အထပ်ထပ်ချည်နှောင်မှုအပြည့်နှင့် ခြေတံရှည်အိမ်ကလေး..။ ရေနံစိမ်းဝနေသော၊ မေတ္တာတရားအပြည့်အဝနဲ့ လူတန်းစေ့ကြီးပြင်းစေခဲ့သော ဧရာဝတီမြစ်ကမ်းနဘေးကအိမ်၊ မြလေးငုံ ရဲ့အိမ်..။

အိမ်ရှေ့လှေကားရင်းမှာ ထိုင်နေတာ အငယ်ကောင်ကလွဲလို့ ဘယ်သူများရှိဦးမှာလဲ..လေးမောင်ပဲနေမှာ..။
 “လေးမောင်…အမေရော..”
“ဟာ..မလေး နင်ရောက်တာနည်းနည်းစောသလိုပဲ”
 “အေးဟယ်..ဒါတောင် စိတ်ထဲမှာနောက်ကျနေတယ်တောင်ထင်တာ.. အမေရောလို့ဆိုနေ..အမေဘယ်သွားလဲ... နင်ရောထမင်းစားပြီးပြီလား”
လေးမောင်က သက်ပြင်းရှည်တစ်ခုမှုတ်ထုတ်လိုက်ပြီးမှ..
“အမေက ခါတိုင်းလိုပဲ မြစ်ဆိပ်မှာထိုင်နေလေရဲ့ နင်လိုက်သွားပါလား မလေး…နင့်ကိုအမေတွေ့ရင် အရမ်းဝမ်းသာမှာ..”
“အေး..ဝမ်းသာဖို့နေနေသာသာ ငါ့မှတ်မိရင်တောင် ကံကောင်း… ရော့ ငါ့အိတ်” နှစ်ယောက်သား ဟက်ကနဲရယ်လိုက်ကြပြီး ချက်ချင်းဆိုသလို ပြန်တည်သွားကြသည်..။
 
-------------------*********---------------------- 

ဧရာဝတီမြစ်က အရင်လိုပါပဲ..။တာဝန်ကျေကျေ စီးဆင်းနေဆဲ၊ လူသားတွေအားလုံးကိုလည်း အကျိုးပြုဆဲ၊ သူ့ရင်ခွင်မှာ လှေကြီးလှေငယ်တို့ ကူးလူးရှင်သန်ဆဲ..။
အမေ..။ မြစ်နဘေးက သစ်ဆုံပေါ်မှာထိုင်နေတဲ့ အမေရယ်..။ မြစ်စပ်မှာတော့ မိန်းမတစ်ချို့ ရေခပ်ဆင်းနေကြသည်ထင့်..။

“အမေ” အမေကမကြားပေ..။ နောက်တစ်ခါအသံမြှင့်၍ ခေါ်ကြည့်သည်..။ “အမေ”
“ဟဲ့…ဘုရား၊ တရား၊ သံဃာ….အမယ်လေး..မယ်မင်းကြီးမ…ညည်းပြန်လာသေးတယ်နော် မြကလေး”
  
မျက်ရည်ဝဲနေတဲ့ အမေ့မျက်နှာမှာ သနပ်ခါးပါးကွက်ကြားကလေးနဲ့ပါ..။ အမေ့ကိုတင်းတင်းကြပ်ကြပ်ဖက်လိုက်မိတော့ အမေက သူ့သမီးမြကလေးကို လွတ်သွားမှာစိုးသည့်အလား အားကုန်ပြန်ညှစ်ကာ ဖတ်ထားလိုက်လေသည်..။ အမေ့ဆံပင်မှာ မြုပ်တစ်ဝက် ပေါ်တစ်ဝက်ပန်ထားတဲ့ ခရေပန်းရနံ့ကတော့ လတ်လတ်ဆတ်ဆတ်မွှေးနေဆဲ..။

“ဟင် သမီးပြန်လာမယ်လို့ အမေ့သား လေးမောင် မပြောဘူးလား၊ အင်း လက်စသတ်တော့ အမေအံ့သြအောင် သူတမင်မပြောတာနေမှာ..”
“အံမာ ညည်းမောင်၊ လေးမောင်လား ငါ့ပြောမှာအေ..။ သူက သူဟာသူတောင်မအားတာ..။ ဒါပေမယ့်ညည်းမောင်က လိမ်တော့ လိမ္မာရှာပါတယ်အေ..။ ငါ့များ ဟင်းချက်ရင်တော့ကူပါတယ်အေ့”
“ဟုတ်လား..ဒါဆိုဒီကောင် အမေ့ကို သမီးမရှိတုန်း ကပ်ချွဲနေတာပေါ့လေ..ဒါနဲ့ အမေ..အဖေ့ကိုလာစောင့်နေတာ မဟုတ်လား..။ သမီးလည်းအတူတူစောင့်ပေးမယ်လေ..အဖေပြန်လာလို့ သမီးအမေနဲ့ အတူမစောင့်စဖူး စောင့်နေတာသာမြင်ရင် ကြိုက်ချင်မှကြိုက်မှာနော်အမေ..”
“မြကလေးရယ် ညည်းဟာလေ အရင်လိုပဲ အဖေနဲ့အမေကို မစမနောက်ရရင် စားမဝင် အိပ်မပျော်ဘူး။ မနာလိုစိတ်ကလည်းကြီးပါ့အေ..။”
ပြောပြီးပြီချင်းအမေ့က ပါးချိုင့်ကလေးများခွက်နေအောင်တောင် ရယ်လိုက်သေးသည်။

နေကညိုလှပြီ။ ဗိုက်ကလည်းဆာနေပြီ။
“အမေ..သမီးဗိုက်ဆာလှပြီ..အိမ်ပြန်ရအောင် အမေ့သားကို အဖေ့လာစောင့်ခိုင်းလေ..နော်အမေ..နော်..အဖေကနောက်ကျမှာသေချာတယ် ဟိုဘက်ကမ်းက ဘကြီးဦးလေး ဦးဘကလေး အကြောင်းလဲအမေသိသားနဲ့..အဖေနဲ့တွေ့ပြီဆို ခွန်းထောက်ဆိုပြရတာနဲ့ နိုင်ငံရေးအကြောင်းပြောရတာနဲ့ အတောသတ်တာမဟုတ်ဘူး..။ သမီးကဒီနေ့မှရောက်တာ အမေနဲ့အိမ်မှာ စကားတွေအများကြီးပြောချင်တာအမေရဲ့။ ရွာထဲက ဦးဖိုးသိန်းသမီး ဝတ်မှုံမြို့တက်သွားပြီး ဘာဆက်ဖြစ်သလဲဆိုတာ ပြောပြချင်တာ သိလားအမေ..နောက်ပြီး စန်းလင်းရောရွာမှာပဲလား..။ လာပါအမေရယ် သမီးတို့အိမ်ပြန်ပြီးစောင့်ရအောင်ပါ..။"

အမေက အဖေ့ကိုသံယောဇဉ်သိပ်ကြီးသည်..။ အဖေပြန်အလာကို မြစ်ဆိပ်မှာ ကိုယ်တိုင်ဆင်းစောင့်ရမှကျေနပ်သူက အမေရယ်..။ ရွာမှာရှိတဲ့ တစ်ခြားအိမ်ထောင်သည်မိန်းမတွေထက် အမေကပိုမည်ထင်သည်..။ ပိုရအောင်ကလည်း အဖေကအမေ့ကို အရိပ်တစ်ကြည့်ကြည့်ရှိသူ၊ အရက်ကလေးနည်းနည်းပါးပါးသောက်တတ်တဲ့အဖေက အမေ့ကို သူရီတီတီဖြစ်ချိန်မှာ ရစ်တတ်သော်လည်း ဘယ်တော့မှမရိုက်..။

အဖေမို့ စိတ်ဆိုးရင် အိမ်ကပစ္စည်းတွေကသာ ဓားစာခံဖြစ်တာ..။ ရွာထဲများလမ်းလျှောက်ထွက်ရင် အဖေက သူ့ဘယ်ဘက်မှာ ကပ်လျှောက်နေတဲ့ အမေ့ခါးကို ဘယ်လက်ကလေးနဲ့ဖက်ထားပြီး အားနေတဲ့ညာလက်တစ်ဖက်က အမေ့ညာလက်ဖဝါးကို ခပ်ဖွဖွဆုပ်ကိုင်ပြီးလျှောက်တတ်တာရယ်...။ ဒါကလည်း အဖေ့ရဲ့သူမတူအောင် အမေ့ပေါ်ထားတဲ့ အချစ်ရဲ့ပြရုပ်လို့ အဖေကဆိုပါသည်..။

မြကလေးဆိုလျှင် အဖေနဲ့ရော အမေနဲ့ပါတူသူကလေးမို့ အဖေကအချစ်ပိုသည်ဟု အမေကပြောလေ့ရှိသည်..။ လေးမောင်ရှေ့တွင်တော့မဟုတ်ချေ။ လေးမောင်ကတော့ အဖေနှင့်ပိုတူမည် ထင်သည်..။

မြကလေးနဲ့ အမေ အိမ်ပြန်ရောက်တော့ လေးမောင်က ထမင်းဝိုင်းပြင်ထားနှင့်ပြီ..။

“ဟဲ့..လေးမောင် နင့်အဖေကို မြစ်ဆိပ်သွားဆင်းကြိုချေ..။ ဟိုမှာဖြင့် ဟိုဘက်ကမ်းကနေ နက်ဖြန်ဖို့ဟင်းစား ဝက်သားနဲ့ ငါးပဲဖြူ တစ်ယောက်တည်းသယ်လာရရင် ပင်ပန်းရှာမယ်ဟဲ့..မှောင်တောင်မှောင်တော့မယ် အမြန်သွားစမ်း”
လေးမောင်ကိုပြောပြီးပြီချင်း အမေကသီချင်းလေးတအေးအေးဆိုကာ ငါးပိရည်ကျိုထည့်ရန်ပြင်ဆင်လေသည်..။ 

မောင်ပြန်လာရင် အဆင်သင့် ကျွေးဖို့ရယ် ချက်ပြုတ်ထားတာ ဖွယ်ဖွယ်ရာရာ၊ များလှပါတယ်။ ကန်စွန်းရွက်ချဉ်ရည် အဆင်ပြေတာရယ်၊ ငါးဖယ်ငါးဆုပ်ကို အကြော်နဲ့ အသုပ်တွဲလို့ ငါးပိရည်လေးမွှေးမွှေးရယ် တညင်းသီးနဲ့တိုို့စေဖွယ်။ မောင်အမောပြေ…….ချောတမေ…..ချက်ပြုတ်ထားပါတယ်………။ 
စားပြီးရင်ကွယ် အချိုတည်းစရာရယ် ညိုနွဲ့….အစ်ကိုရဲ့…. .ထန်းလျက်ခဲပါတယ်…..တီတီတာတာ….မောင့်အနားမှာကွယ်…လက်ဖက်ရည်ကြမ်းငှဲ့လို့ရယ်….. မောင်အမောပြေ…….ချောတမေ…..ချက်ပြုတ်ထားပါတယ်………

အမေသည် အပျိုဖြန်းကလေးလိုပြန်ဖြစ်နေသည်ဟု မြကလေးထင်သည်..။ အမေ့ကို ခပ်ပြုံးပြုံးသာ ကြည့်နေလိုက်မိတော့သည်..။ အမေရယ်…ချစ်တတ်ရန်ကော…။

လေးမောင်ကအမေ့ကို တစ်ချက်လှမ်းကြည့်လိုက်ပြီး အမေ့အလိုကျ အဖေ့ကိုကြိုဖို့ ပုဆိုးတိုတိုပြင်ဝတ်ကာ အိမ်မှထွက်လေပြီ..။ အမေစိတ်ချမ်းသာဖို့ လိုသည်လေ..။

မြကလေးတို့အိမ်မှာ ဝက်မွေးသော်လည်း ဝက်သားကြိုက်သောအမေက ချက်ချင်းပေါ်သော ဝက်သားကိုမစား၊ ရွာမှာလှေနဲ့လာရောင်းလေ့ရှိတဲ့ အသားငါးကိုသာအမေစားသည်..။ အဖေကတော့ ငါးပဲဖြူအိုးကပ်ကို အလွန်ကြိုက်လေသည်.။ အမေတစ်ယောက်မှာတော့ အဖေစားချင်သမျှ မညည်းမညူချက်ကျွေးတတ်သူရယ်..။
အလွန်ဥာဏ်ကောင်းသော၊ ထက်မြတ်သော အမေ့ကိုအဖေက ဆယ်နွေဆယ်မိုး စောင့်ခဲ့ရပါသည်..။ ဒါ့ကြောင့်လည်း အလွန်ယဉ်သော၊ သိမ်မွေ့သော၊ ထက်မြတ်သော အမေ့ထံမှ မေတ္တာပန်းကို အဖေတစ်ယောက်တည်းသာ ပိုင်ဆိုင်ခွင့်ရရှိခဲ့တာမဆန်းပေ.။ 

ဟုတ်သည်..။ အမေကထက်မြတ်ပါသည်..။ ဥာဏ်လည်းအင်မတန်ကောင်းသည်..။ ဂဏန်းသင်္ချာ အပေါင်း၊ အနုတ်၊ အမြောက်၊ အစားတွက်လျှင် မြကလေးတို့ထက် လျှင်သည်..။ အဖြေနောက်ကျပေးတတ်သော မြကလေးကို မြို့မှာဘယ်လို စာသွားသင်မတုန်းဟု အမေက အမြဲစစနောက်နောက်ပြောလေ့ရှိတာပင်..။ မြို့ကပြန်လာသော မြကလေးကိုလည်း အမေကောင်းကောင်းကြီး မှတ်မိသည်..။ ရွာမှာအိမ်ခြေဘယ်နှစ်ခုရှိတယ်ဆိုတာလည်း အမေသိသည်..။ ရွာကလူတွေအားလုံးရဲ့ နာမည်တွေကိုလည်း အမေကောင်းကောင်းကြီးရွတ်ပြနိုင်သေးသည်…။ 

အမေမမှတ်မိတာ တစ်ခုသာရှိသည်..။ မြကလေး အိမ်ကထွက်မသွားခင် လှေငယ်ကလေးလှော်လို့ ဟင်းစားဝယ်ထွက်ရှာတဲ့ အဖေ ဝဲထဲပါပြီး အိမ်ပြန်မလာနိုင်တော့ဘူးဆိုတာကိုပါပဲ..။ အဲဒိနေ့ကစလို့ အမေ့မှတ်ဥာဏ်ဟာ တစ်စုံတစ်ရာမှာ ရပ်တန့်ပိတ်ဆို့နေခဲ့တာပါပဲ..။ နေလုံးလည်းဝင်သွားခဲ့ပြီ..။ ငှက်တို့လည်းအိပ်တန်းတက်ကြပြီ။ မြကလေးဆေးတိုက်ထားလို့ အမေလည်းအိပ်ပျော်ခါနီးပြီ..။ လေးမောင်လည်း မြစ်ဆိပ်မှ ပြန်လာတော့မည်..။ 

မြကလေးအိပ်ချင်လှသော်လည်း လေးမောင်ပြန်လာတဲ့အထိစောင့်ရပါမည်..။ ပြီးမှဘုရားရှိခိုးဝတ်ပြုမည်..။ မြတ်စွာဘုရားသခင်ထံ အမေ့မှာရှိတဲ့ ဝဋ်ကြွေးတွေကျေစေဖို့၊ အဖေနဲ့လှေငယ်ကလေးဘယ်တော့မှ ပြန်လာတော့မှာမဟုတ်ဘူးဆိုတာ အမေပြန်သတိရစေဖို့ ဒီတညလည်း မြကလေး ထပ်ဆုတောင်းရပါဦးမည်..။

-------------------*********----------------------
 
-------------------*********----------------------


ပင်လယ်ထဲမှာ အသက်မွေး၍ မိသားစုကိုကျွေးမွေးစောင့်ရှောက်ခဲ့သော ကျွန်မ၏ကျွေးသဖခင်ကျေးဇူးရှင် ဖေဖေ၊ ကျွန်မအား သမီးအရင်သဖွယ် ချစ်ခင်သော၊ ဥပဒေအရတော်စပ်သော အဖေ (အိမ်ကလူ၏ဖခင်)၊ ဖခင်တို့ဝတ်တရားကျေပွန်အောင် ကြိုးစားနေသော၊ တစ်နှစ်ပြည့်ခါနီးပြီဖြစ်သော ကျွန်မချစ်သောသမီးလေး၏ ဖခင်ဖြစ်သူ အိမ်ကလူး) နှင့်တကွ ကမ္ဘာတစ်ဝှမ်းမှ ဖခင်လောင်းများ၊ ဖခင်များအားလုံးအား ဒီပို့စ်ဖြင့် လေးစားဂါရဝပြုပါတယ်..။

အားလုံးပဲ Happy Father's Day ပါရှင်..။
 

24 comments:

  1. Happy Father's Dayပါ ညီမရေ...၊ ရင်ထဲ ထိသွားတာပဲ၊ အဖေ့ကို သတိရပြီး မျက်ရည်ဝဲမိရတယ်။ ရသမြောက်တဲ့ ဝတ္တုကောင်းလေး တပုဒ်ပါပဲ....Carry on !!!

    ReplyDelete
  2. မမချစ်ကြည်ရေ..
    Happy Father's Day too ပါနော်..။ ဒီပို့စ်ရေးတုန်းကလည်း ခံစားချက်တွေနဲ့မို့ ထင်ပါရဲ့မရယ်..အဖေနေ့မှာ အလွမ်းနဲ့ဇာတ်သိမ်းသလို ဖြစ်သွားရပြီ..။ ရင်နဲ့ခံစားဖတ်ရှုပေးသွားလို့ အရမ်းကျေးဇူးတင်ပါတယ်..

    လေးစားချစ်ခင်တဲ့

    ReplyDelete
  3. ငိုသွားတယ် မမရယ်။

    ReplyDelete
  4. ညီမလေးJune 19, 2011 8:21 PM

    ငိုချင်တာ.......

    ReplyDelete
  5. မွေးလာကတည်းက အဖေရင်း အမေရင်းဆိုတာ ဘယ်မှာမှန်းမသိတဲ့ ကျမ အတွက်တော့ ဒီ POST လေးဖတ်ရင်းယောင်ရမ်း တွေးရင်းပေါ့။
    ဘာပဲဖြစ်ဖြစ် အေးချမ်းမှုနဲ့ အတိပြီးသော ဖခင်များနေ့ ဖြစ်ပါစေ။း)

    ( ရိုးရ )

    ReplyDelete
  6. ညီမလေး ခရမ်းနွယ်ရေ...
    မငိုပါနဲ့ ကလေးရယ်..လို့ပဲပြောပါရစေ..။ အစ်မလည်း မနေ့ညကရေးရင်း ငိုချင်လို့ ဇာတ်ကိုအတင်းသိမ်းလိုက်ရပြီး မနက်ကျမှပဲ တင်နိုင်တော့တယ်..။ စာလာဖတ်တာကျေးဇူးနော်..။


    ညီမလေး...
    ကျွန်မစာထဲက တစ်ခုခုပေးမိတယ်ဆိုရင်ပဲ ဝမ်းသာမိပါတယ်..ငိုတော့မငိုပါနဲ့ရှင်..း)စာဖတ်ပေးသွားတဲ့အတွက် ကျေးဇူးတင်ပါတယ်..။


    ရိုးရ ရေ..
    အတော်လေးစိတ်မကောင်းဖြစ်မိရပါတယ်..။
    ကျွန်မအသက် ၁၅နှစ်ကစလို့ အမေတစ်ယောက်တည်းနဲ့ ဆက်ရှင်သန်ရတာတောင် အတော်လေးအားငယ်ခဲ့ရသေးတာ...။
    ဘာပဲဖြစ်ဖြစ် ပြီးဆုံးအောင်ဖတ်ပေးသွားတဲ့အတွက် ကျေးဇူးတင်မိပါတယ်။

    ReplyDelete
  7. ရေးမယ့်ရေးတော့လည်း အနှစ်တွေကြီးပဲ.. မမ တို့များ.. ဒီပိုစ့်လေးဖတ်ပြီး ဟိုသီချင်းလေးကို သတိရမိတယ်.. "တနေ့တော့လေ.. လေမုန်တိုင်းကြီးကျလို့လာ.. ဟိုးအဝေးမှာ ပင်လယ်ထဲ ငါးဖမ်းသွားတဲ့ တို့ရဲ့အဖေ.. အိမ်ပြန်ချိန်မှာ နောက်ကျခဲ့ပြီ နေ၀င်တဲ့အခါ....." စာသားတော့ ဟုတ်ရဲ့လားမသိဘူး.. ဒါပေမယ့် ၀မ်းနည်းစရာကောင်းတာတော့ အမှန်ပဲ.. :(

    ReplyDelete
  8. ♫ မွန်းလွဲချိန် နေရောင်လည်း ကျလုပြီ.. ဝေးဝေးမှာ လှေငယ်လေး မျောရင်းမျောရင်းနီးလို့လာ အဖေပြန်မပါလှိုင်းများ ပုတ်ကာ အဆုန်အဆန်မျောလာ…♪(သီချင်းဆက်ဆိုတား))

    ဟုတ်တယ်ညီမလေး Candy.. သီချင်းက ကိုယ့်အဖေကိုများ ရည်ညွှန်းဆိုသလားရယ်လို့ အောက်မေ့ရအောင်ကို တိုက်ဆိုင်လွန်းပါတယ်..။ အဲဒီသီချင်းကို နားမထောင်ဖြစ်တော့ဘူး မခံစားနိုင်လို့..ဒါပေမယ့် ကံမကောင်းစွာပဲ စာသားတွေကိုအလွတ်ရနေတယ်း( ကိုယ့်အဖေအကြောင်း အခြေအနေပေးရင်ရေးပါဦးမယ်..။

    ReplyDelete
  9. စောင့်နေတဲ့ အမေရဲ့ အခြေအနေက တစွန်းတစ ပေါ်နေပေမယ့် အဲဒါကိုက သဘာဝကျတဲ့ အရေးအဖွဲ့လေး ဖြစ်သွားပါတယ်။ ဖတ်ရတာ ထိထိရှရှလေးပါ။

    ReplyDelete
  10. အဲဒီနေ့လေးကို မှတ်မိနေတယ်

    ReplyDelete
  11. အစ်ကိုမြစ်ကျိုးအင်း..
    ဟုတ်ကဲ့ ပေါ်နေတယ်နော်း)) ကောမန့်အတွက်ကျေးဇူးပါ။


    အစ်မသု..
း(

    ReplyDelete
  12. ဖတ်ရတာ ဆွဲဆောင်မှု ရှိတဲ့ ဇာတ်အိမ်လေးပါ . . . အစပိုင်း ရုတ်တရုတ် . . ဇာတ်အိမ်ကို တချက်လေး မျက်စိလည်သွားတာကလွဲရင် အောက်ပိုင်းရောက်လေ အရေးအသားပိုညက်ညောလာလေပါပဲ . . . ဇာတ်အိမ်ဟာကွက်နည်း လာလေပါပဲ . . . သိပ်ကောင်းတဲ့ ဇာတ်အိမ်လေးပါ . . .

    ခင်မင်စွာဖြင့်
    ဗညားရှိန်

    ReplyDelete
  13. ဟုတ်ကဲ့ ကိုဗညားရေ..အစပိုင်းမှာ မျက်စိလည်သွားစေတာကတော့ ရေးတဲ့သူရဲ့ညံ့ချက်ပါရှင်း)
    သေသေချာချာလေးဖတ်ပြီး ဝေဖန်အကြံပြုသွားတဲ့အတွက် ကျေးဇူးကမ္ဘာ..။

    ReplyDelete
  14. ဇာတ်လမ်းထဲမှာ မေတ္တာရဲ့ရနံ့တွေ တဝကြီးရလိုက်တယ်... အသိမ်းလေးမှာတော့ လည်ချောင်းတွေ ချောက်လာတယ်... သီချင်းလေးညည်းရင်း ထမင်းပွဲပြင်နေတဲ့ လေးမောင်နဲ့မလေးတို့ အမေ... စာတစ်ပုဒ်ပေမယ့် အဖြစ်အပျက်တစ်ခုလို မျက်လုံးထဲ မြင်ယောင်နေမိတယ်... ရေးတတ်လိုက်တာ မမပန်းချီရယ်...

    ReplyDelete
  15. ပန်းချီ (ဒီဘလော့နဲ့ ပတ်သက်သမျှ ရှိသမျှပန်းချီအားလုံး) ကလည်း ခါတိုင်းလိုပဲ လှလှလေး...း)

    ချစ်တဲ့
    Annoying Person

    ReplyDelete
  16. ဟုတ်လိုက်လေ..တစ်ကယ့်ဖြစ်ရပ်မှန်ကို ဇာတ်အိမ်ဖွဲ့ထားတာပါ ညီမလေး သူသူရေ။ ဇာတ်လမ်းထဲက အမေရဲ့အခြေအနေကို မြင်လိုက်သေး သူသူတို့တော်လိုက်ပုံး)ကျေးဇူးကမ္ဘာနော်..။

    လှေပန်းချီကတော့ လှချင်လှပါလိမ့်မယ် ညီမလေးရယ်..
    မိုးပန်းချီကတော့ ခုရက်ပိုင်း စိတ်ပန်းလူပန်းမို့ အချိူးမညီချင်တော့ဘူးရယ်း))

    ReplyDelete
  17. (မမ)မိုးပန်းချီကတော့ ဆိုးပြီ... တမျိုးရီရအောင် (မဟုတ်တာတွေ) တိုးလို့မသီလိုက်ပါနဲ့... မိုးပန်းချီဆိုတာ အချိုးက ထာဝရ ညီမှညီ...း)))

    ရှိသမျှပန်းချီအားလုံး လှသည်။ (အဆိုတင်သွင်းပါတယ်။ ထောက်ခံပါတယ်။ (ကန့်ကွက်သူမရှိပါ)။ အတည်ပြုပါတယ်... ကဲပြီးပြီ ဘယ်သူမှ ကန့်ကွက်လို့မရတော့ပါး))

    ဇာတ်လမ်းထဲက အမေရဲ့အခြေအနေကို မြင်လိုက်တာ ရေးတဲ့သူ တော်လို့ပေါ့။ စာဖတ်သူ သူသူတော်တာ ဘယ်ဟုတ်ပါ့မလဲ။ တကယ့်ဖြစ်ရပ်မှန်းလေး ဆိုတာကိုတော့ တကယ်ကို စိတ်မကောင်း ဖြစ်ရပါတယ် မမပန်းချီရယ်...

    ReplyDelete
  18. အို....ဘိုးဘိုးဘီဘီ လက်ထက်ကတည်းက အိုးစည်တွေလည်း ရောင်းပါသေးသည်..။ ပိုးတီချဉ်လည်းပါသဗျို့..
    (သူသူ့ကိုမနိုင်လို့ ရောချသွားပါသည်..:D)

    ReplyDelete
  19. အစ်မမိုးပန်းချီရဲ့ ၀တ္ထုတိုလေး လာဖတ်တယ်။ တကယ့် ဖြစ်ရပ်မှန်လေးမို့ ရင်ထဲ နင့်ပြီး ကျန်ခဲ့တယ်။ အစ်မ မေမေ သနားပါတယ်နော်။ အစ်မတို့ မိသားစုလေး အားလုံး ပျော်ရွှင်ချမ်းမြေ့ပါစေရှင်။

    ReplyDelete
  20. rose ရေ..
    စာလာဖတ်ပြီး အားပေးသွားတဲ့အတွက် ကျေးဇူးအများကြီးတင်ပါတယ်..။ rose တို့တစ်မိသားစုလုံးလည်း ရွှင်လန်းချမ်မြေ့ကြပါစေ။ rose ရဲ့ညီမလေးလည်း နေကောင်းမယ်လို့ မျှော်လင့်ပါတယ်း)

    ReplyDelete
  21. ဖတ်ပြီး တကယ်ပဲ ဝမ်းနည်းသွားပါတယ်...
    ရေးတတ်လိုက်တဲ့ ညီမလေး မိုးပန်းချီ...း)

    ReplyDelete
  22. မမြသွေးနီ blog digest ကနေ ရောက်လာပြီး ဖတ်တာပါ။
    မအားတာနဲ့လည်း စာတွေသေချာလည်မဖတ်နိုင်ပါဘူး။
    ညီမရဲ့ ကမ်းဝေးလှေ လေးဖတ်ပြီး ၀မ်းနည်းသွားတယ်။
    မြကလေးလိုပဲ ဆုတောင်းပေးသွားပါတယ်။
    စာရေးသိပ်ကောင်းတယ်။ အချိန်လေးလုပြီး စာရေးပါဦး။

    ReplyDelete
  23. မမသက်ဝေ...
    အဟောင်းစာလေး ဖတ်ပြီး အားပေးသွားလို့ ကျေးဇူးတင်ပါတယ် မရေ..စကားပြောနဲ့စကားပြေ ရောနေတာကို ပြင်ရမှာပျင်းပြီး ဒီလိုပဲတင်လိုက်တဲ့ ပို့စ်လေးပါ..။ အာာာာာာဘွာာာာာားးးးး)))

    မဖြိုးရေ..
    ညီမလည်း တကယ်ကို ဘလော့ဂ်မလည်နိုင်၊ စာမဖတ်၊မရေးနိုင်ဖြစ်နေတာ နှစ်တောင်ချို့တော့မလားပဲ..။ စာရေးကောင်းတဲ့ အစ်မဖြိုးဖြိုးက စာရေးကောင်းတယ်ဆိုလို့ မြောက်သွားပြီးD အချိန်ကိုလုပြီး စာရေးဖို့ကြိုးစားနေပါတယ် မရေ.. အချိန်ကကိုယ့်ကို ပြန်လုနေတယ်း))

    ReplyDelete
  24. တစ်ကယ့်ကို ရင်ထဲရောက်တဲ့စာလေး.. ဒါနဲ့ပါဆို နှစ်ကြိမ်မြောက် ဖတ်ခြင်းပဲ..မမရေ..:)

    ReplyDelete

ရင်ထဲရှိတာပြော..း)